Job 3

Inkulumo KaJobe

1 Ngemva kwalokho uJobe wavula umlomo wakhe waliqalekisa ilanga azalwa ngalo.

2 Wathi:

3 “Sengathi ilanga lokuzalwa kwami lingatshabalala, lalobobusuku okwathiwa, ‘Kuzelwe umfana!’

4 Lolosuku sengathi lungaphenduka umnyama; sengathi uNkulunkulu ophezulu angalunanzi; lokukhanya kucime mhla lowo.

5 Sengathi umnyama lethunzi elikhulu kungaluginya njalo; sengathi iyezi lingalusibekela; sengathi umnyama omnyama ungalugubuzela.

6 Lobobusuku – sengathi umnyama ungabuthi jwamu; sengathi bungayekelwa ukubalwa kanye lezinsuku zomnyaka futhi bungangeniswa lakuyiphi inyanga.

7 Sengathi lobobusuku bungaba yinyumba; sengathi kungeze kwezwakala umsindo wentokozo mhla lokho.

8 Sengathi labo abaqalekisa izinsuku bangaluqalekisa lolosuku, labo abazimisele ukuhlokoza uLeviyathani.

9 Sengathi izinkanyezi zalo zokusa zingafiphala; lulindele imini kube yize lungayiboni imisebe yokuqala yokusa,

10 ngokuba kaluyivalanga iminyango yesizalo ngisiza ukufihla uhlupho emehlweni ami.

11 “Kungani ngingafanga ngizalwa, ngahle ngacitsha ngisaphuma esiswini na?

12 Kungani kwaba lamadolo okungemukela lamabele okungimunyisa na?

13 Ngoba manje ngabe ngilele ekuthuleni; ngabe ngisebuthongweni ekuphumuleni

14 kanye lamakhosi labeluleki bomhlaba, ababezakhele izindawo okwamanje sezingamanxiwa,

15 kanye lababusi ababelegolide, ababegcwalise izindlu zabo ngesiliva.

16 Kumbe kungani ngingathukuzwanga emhlabathini njengomphunzo na, njengosane oluvele lungazange lubone ukukhanya kosuku?

17 Khonale ababi kabasaxokozeli, njalo khonale abakhatheleyo basekuphumuleni.

18 Abathunjiweyo labo bazuza ukukhululeka; kabasakuzwa ukuhaladwa ngumtshayeli wezithunjwa.

19 Abantukazana lezikhulu bakhona, lesigqili siyakhululwa enkosini yaso.

20 “Kungani ukukhanya bekuphiwa labo abasosizini na, lokuphila labo abalobuhlungu emphefumulweni,

21 kulabo abakhalela ukufa okungafikiyo, abakuthungathayo okudlula ingcebo efihliweyo,

22 abaphuphuma ngenjabulo bathokoza nxa sebefika engcwabeni?

23 Kungani impilo iphiwa umuntu ondlela yakhe ifihliwe, uNkulunkulu amhonqolozeleyo na?

24 Ngokuba ukububula kuyangifikela endaweni yokudla; ukugomela kwami kuthululeka njengamanzi.

25 Ebengikwesaba sekungehlele, obekungitshayisa uvalo sekwenzakele kimi.

26 Kangilakho ukuchelesa, kangilakho ukuthula; kangilakuphumula, ukuhlupheka kuphela.”